Kadungan sang pagtakop sang MassKara Festival 2025 sa Bacolod, ginpasidunggan ang Bombo Radyo bilang may pinakamanami nga coverage sang Arena and Street Dance Competition.
Sa Media Night Sabado sang gab-i, ginhatag sa Bombo Radyo Bacolod ang award bilang AM Best in Arena and Street Dance Live Coverage.
Nagpangibabaw ang Bombo Radyo sa duha ka iban pa nga radio stations sa Bacolod nga amo ang Aksyon Radyo kag RMN.
Ini ang labing una nga kahigayunan nga ginhatagan sang Bacolod City Government kag sang organizer sang pagkilala ang nagpatigayon sang live coverage kun sa diin sila mismo ang nagjudge paagi sa pagmonitor sa live coverage.
Diri ginpamatud-an sang Bombo Radyo ang supremacy sa kahanginan, sa radyo man ukon sa digital platforms
Sa ngalan sang serbisyo publiko, wala nangin upang ang madamol nga ulan sang Oktubre 18 sa komprehensibo nga coverage sang Bombo Radyo sa Arena and Street Dance Competition School Category.
Gindeklarar nga champion ang Estefania Elementary School nga nagpauli sang P750,000 cash prize; 1st runner-up ang Paglaum Village Elementary nga may P300,000.00 kag second runner- up Asuncion L. Lizares Elementary School nga may P200,000.00 nga premyo.
Oktubre 19, hugpong pwersa gihapon ang Bombo Radyo Bacolod para sa live coverage sang Arena and Street Dance Competition Barangay Category halin sa Paglaum Sports Complex padulong sa Araneta Street kag Bacolod City Public Plaza.
Kaangay sang nakaandan kada tuig, nangin madinalag-on ang coverage sang Bombo Radyo Bacolod kun sa diin wala ini nagtakop sa announcement of winners kundi nabatian man ang reaksyon sang mga nagdaog.
Nakuha sang Barangay Tangub ang kampeonato nga nakakuha sang P1 million cash prize plus ang special awards; 1st runner up ang Barangay Bata nga nakakuha sang P500,000 cash prize plus special awards kag 2nd runner-up ang Barangay 29 nga nagpauli sang P300,000.00 plus special award.
Ang coverage team ang ginlakipan nanday Bombo Ann Sindol-Sorilla, Bombo Arjay Kim Casipe, Bombo Jireh delos Reyes, Bombo Dennis Rubica, Bombo Denver Quijano, Bombo Gracelyn Lobaton, Bombo Mia Francisco, Bombo Fons Espino, Bombo Jaz de Jesus-Madrigal kag Bombo Erlyn Bayonita-Arroyo
Inyo man gintutukan ang live updates sa amon nga Facebook page pinaagi sa News Department.
Sa liwat, madamo gid nga salamat, mga Ka-Bombo.
Tubtub sa masunod nga tuig! May pasidungog man ukon wala, kultura na sang Bombo Radyo ang live nga coverage sang kahiwatan.
Sa pagpamuno sang amon Station Manager, Bombo Daniel Lecciones, 𝐁𝐚𝐬𝐭𝐚 𝐑𝐚𝐝𝐲𝐨….𝐁𝐨𝐦𝐛𝐨!!! .
