Isa ka miyembro sang New People’s Army ang patay kag isa ang pilason kasunod sang engkwentro batok sa mga suldado sa Binalbagan, Negros Occidental, Biyernes sang hapon.
Sa interview sang Bombo Radyo Bacolod kay 303rd Infantry Brigade commander Brigadier General Benedict Arevalo, nagpatigayon sang pursuit operations ang mga miyembro sang 62nd Infantry Battalion sa mga miyembro sang NPA nga nagsulod sa balay ni Punong Barangay Charlie Zambrona sang Zone 3, Brgy. Tinongan, Isabela, Negros Occidental sang Miyerkules sang gab-i.
Pag-abot sang mga ini sa Sitio Tambo, Barangay Santol, Binalbagan, naengkwentro sang mga suldado ang indi magnubo sa 15 ka mga miyembro sang NPA.
Makaligad ang masobra isa ka oras nga linukpanay kag linagsanay suno kay Arevalo, isa ka miyembro sang NPA ang patay samtang isa naman ang napilasan sa nawala nga kilid.
Sa karon, wala pa nakilala ang NPA member nga napatay samtang iga-turnover naman sa mga pulis ang pilason nga rebelde.
Wala naman sang napilasan sa mga miyembro sang 62nd IB PA.
Suno sa Army commander, nagpatigayon sila sang pursuit operations sang ginsulod sang mga rebelde ang balay ni Brgy. Captain Zambrona sang Miyerkules sang gab-i apang wala didto ang barangay official.
Ginpangita sang mga suspetsado ang pusil sang barangay kapitan apang wala sila sang may nakita sa sulod sang balay.
Wala man nila ginsakit ang asawa kag mga bata sini.
