Isa ang napatay samtang isa ang nasamaran sa bahin sang militar sa engkwentro batok sa gina-alegar miyembro sang New People’s Army sa boundary sang Tanjay kag Bayawan City, Negros Oriental kahapon sang aga.
Ang napatay ang ginkilala nga si Corporal Renold Gardose, 29 anyos, residente sang probinsya sang Capiz, samtang ang nasamarang ang isa naman ka Private First Class.
Sa interview sang Bombo Radyo Bacolod kay Lt Col Sol Zaulda, Commander sang 11th Infantry Battalion sang Philippine Army, apat ka asod-asod nga engkwentro ang natabo nga nag-umpisa alas-5:30 sang aga kag ang ulihi sang alas-7:40 sang aga.
Suno diri, ginabanta yara sa pito ka mga miyembro sang Communist Terrorist Group ang ila nga naka-engkwentro, kag sa karun padayun pa ang hot pursuit operation.
Pahayag sini nga nakabatun sang report ang militar nga may extortion activities nga ginapatigayon ang rebelde nga grupo sa Barangay, gani ini ang ila ginrespondihan, nga nagdangat sa engkwentro.
Ginakasubo man sini nga may-ara sang militar nga naghalad sang kabuhi.
Ginalantaw sini nga may nasamaran man sa bahin sang NPA, bangod sa nakita nga mga tinulo sang dugo sa encounter site.
Wala naman sang evacuees, bangod ang engkwentro ang natabo malayo na sa mga pamalay.
Nagahingyo ini sang kooperasyon sang mga pumuluyo nga ipahibalo sa militar kun may makita nga presensya sang rebelde nga grupo agud matapos na ang insurhensya sa Negros Island.
