Isa ang patay kag isa ang pilason matapos nga nagbunggo ang motorsiklo sa kotse malapit sa Valley of Peace, Circumferential Road, Barangay Mandalagan syudad sang Bacolod sang Sabado sang gab-i.
Sa interview sang Bombo Radyo Bacolod kay Police Lt. Jose Rollo, deputy station commander sang Bacolod Police Station 3, ang Suzuki Ciaz ang nagikan sa sur padulong sa norte nga direksyon samtang ang motorsiklo ang nagikan sa norte padulong sa sur nga direksyon kag sang nagdangat na sa kurbada sa unhan sang Valley of Peace Cemetery, nabungguan sang salakyan ang motorsiklo.
Suno diri, sa inisyal nga imbestigasyon, ginkaon sang motorsiklo ang lane sang salakyan kun sa diin natabo ang insidente.
Nagpaconfine sa ospital ang driver sang salakyan nga ginkilala kay Ira De Guzman, 24 anyos kag residente sang Gold Crest Subd., Barangay Bata, syudad sang Bacolod bangud naglain man ang pamatyag samtang napatay naman ang angkas sang motorsiklo nga si Perlyn Naranja, 19 anyos kag residente sang Prk. Lunok, Barangay Felisa, ciudad sang Bacolod.
Suno kay Rollo, ginhingagaw pa dala sa ospital si Naranja apang gindeklarar nga dead on arrival samtang padayon naman nga ginabulong sa hospital si Cañete.
May yara naman sang inisyal nga settlement sa tunga sang magtimbang nga bahin matapos nga makaestoryahanay kag nakahatag naman sang bulig pinansyal ang nakabunggo sa pamilya sang biktima.
