Isa ang napatay samtang 11 naman ang pilason sa pagbunggu-anay sang delivery van kag canter truck sa Sitio Punod, Brgy Rizal, San Carlos City alas-9:00 sang aga.
Ang napatay ang nahibaluan nga isa ka Barangay health aide nga padulong kuntani sa blood letting mission.
Sa una nga impormasyon gikan sa San Carlos City Disaster Risk Reduction and Management Office, isa ang napatay kag napulo ang pilason gikan sa personnel sang San Carlos City Government.
Sa inisyal nga impormasyon sang San Carlos CDRRMO, ang delivery van ang ginadala ni Artemio Evangelista, 49 anyos, residente sang Brgy. Old Escalante, Escalante City; kag helper sini nga si Roy Nagre, 39 anyos, residente sang Brgy. Miranda, Hinoba-an.
Sakay naman sa Canter Truck ang napatay nga Barangay Health Aide nga si Perfecto Magbanua, nga nabuka ang bagol; samtang pilason naman ang driver nga si Alex Genon, 35 anyos, kasado, residente sang Sitio Lapu-Lapu, Brgy. Quezon, San Carlos City, nga nag-agom sang pilas sa tiil kag sa agtang; Dr. Minerva Alcarde, 80 anyos, Physician sa City Health Office nga napilpilan sang canter truck kag nag-agom sang pilas sa tiil kag spine injury, apang sa karun estable na ang kondisyon; Marian Garcis, 49 anyos, nag-agom sang pilas sa ulo kag bukol sa agtang; Audie Emmanuel Hemida, 38 anyos, single, Local Government employee, residente sang Habitat, Brgy. Palampas, San Carlos City; Kristine Miñosa, 43 anyos, kasado, Medical Technicia, residente sang Burgos St., Brgy 6, San Carlos City; Valaine Dineros, 42 anyos; Cris Ian Caballero, 49 anyos; Sharon Rose Valderrama; kag Vertil Alipis, 55 anyos.
Ginapahayag nga padulhog ang delivery van kag nadulaan sang prino, samtang pataklad naman ang Canter Truck nga padulong kuntani sa Brgy Quezon para sa blood letting activity.
