Patay ang isa ka Bacoleño samtang pilason ang tatlo ka iban pa sang mahulog sa pil-as ang ila ginasakyan nga truck sa ciudad sang Bayawan, Negros Oriental kahapon sang hapon.
Alas-3:40 kahapon sang nagluntad ang aksidente sa Sitio Balaobalaoan, Brgy. Nangka, Bayawan City.
Sa pag-usisa sang mga kapulisan, gikan sa ciudad sang Bacolod ang mga biktima kag puno naman sang nagkalain-lain nga baligya ang truck nga ila ginasakyan.
Ginkilala ang napatay nga si Jake Librando, 19-anyos sang Burgos Street, Brgy 9, Bacolod City samtang pilason naman ang iya mga kaupdanan nga sanday Kim Jaycel Zamora, 18, sang Luzuriaga St., Brgy. 27; Rosalinda Tuazon, 19, sang Burgos St., Brgy 9, kag ang driver sang truck nga si Jemar Jison, 28, sang San Juan St., Purok Kabuhi, Brgy 10.
Gindala sa Corazon Locsin Montelibano Memorial Regional Hospital diri sa Bacolod sanday Zamora, Tuazon kag Librando kun sa diin ini napatay samtang sa hospital naman sa Bayawan ginbulong si Jison.
Nahibaluan nga nagapadulhog sa kurbadahon nga dalan ang truck kag nadulaan ini sang preno rason nga nahulog ini sa pil-as.
