Isa patay samtang pilason ang 35 kamga indibidwal matapos nga matumba ang city bus sang Bacolod City sa Purok Talos, Brgy Igmaya-an, banwa sang Don Salvador Benedicto, kaina alas- 5:36 sang hapon.
Sa interview sang Bombo Radyo sa dryaber sang bus nga si Nelmo Gonzaga, gindul-ong sini ang mga manunudlo sang Paglaum Village Elementary School sa ciudad sang San Carlos para sa ila nga team building sa Sipaway Island.
Alas- 4:00 sang hapon sang naghalin sila sa ciudad sang San Carlos para magbyahe na pabalik sa ciudad sang Bacolod.
Suno kay Gonzaga, paglab-ot sa kurbada sa Purok Talos, Brgy Igmaya-an, banwa sang Don Salvador Benedicto, mahinay lamang ang biyahe sini kag iya ginkakibot nga wala nagkagat ang preno sang bus.
Suno diri, mas ginpili na lamang sini nga itumba ang bus kumpara nga madagdag pa ini sa pil-as.
Pagkatumba, gilayon sini nga ginbuligan ang mga pasahero nga makagwa sa bus, samtang, napatay naman ang isa ka manunudlo nga ginkilala nga si Arlyn Tolosa Verde.
Pahayag ni Gonzaga, kapin sa 30 ka tuig na ini nga nagatrabaho bilang drayber kag siya ang isa ka regular employee sang ciudad sang Bacolod.
Kag antes magbyahe ginastekyar gid sini ang kondisyon sang bus.
Dugang pa sini, masami man ini nga magbyahe sa banwa sang Don Salvador Benedicto, apang sa karun pa lamang ini naaksidene sa banwa.
Nagpangayo naman sang pasaylo si Gonzaga sa mga biktima, ilabi na sa pamilya sang napatay nga manunudlo, nga wala man sini ginhungod kag wala man sang may nag-ekspektar sa matabo, kag gintinguhaan sini nga masalbar ang tanan.
