BACOLOD CITY — Nagdangat sa 18 ka balay ang totally-burned samtang 4 naman ang partially-damaged sa sunog nga nagluntad sa Purok Sto. Niño, Brgy. Sum-ag ciudad sang Bacolod, Miyerkules sang hapon.
Ini ang ginkumpirmar ni City Fire Marshall Fire Chief Inspector Publio Ploteña.
Santo sa ila nga imbestigasyon nagsugod ang kalayo sa balay ni Rogelio Oñate bangud sang short circuit sa electrical wiring.
Kapin sa P150, 000 naman ang ginabanta nga kahalitan sang nasambit nga sunog kun sa diin may isa nga napilasan.
Nagsugod ang kalayo ala-1:20 sang hapon kag gindeklalar nga fire out alas-2:05 sang hapon.
Samtang suno kay Ploteña, nagadangat naman sa P80, 000 ang halit sang sunog nga nagluntad naman sa Purok Hollow Blocks, Barangay Singcang, ciudad sang Bacolod kahapon sang kaagahon kun sa diin napatay ang 81-anyos nga si Edison Hojilla.
Ang wala naman napatay nga uling sa dapog sa balay sang biktima ang ginalantaw sang Bureau of Fire Protection (BFP) Bacolod City gintunaan sang sunog.
Nahibaluan nga magluwas sa balay sang napatay, naupos man ang balay sang bata sini nga si Herson, Erlinda Aguilar kag Rica Aguilar.
Naghatag na ang Department of Social Services and Development Office (DSSDO) sang relief packs sa mga nasunugan sa Purok Sto. Niño, Brgy. Sum-ag kahapon.
Suno kay Punong Barangay Rodney Carmona nagdul-ong na kagab-i ang DSSDO sang relief packs nga ginalakipan sang bugas, noodles kag kape sa mga nasunugan nga temporaryo nga nagatiner sa covered court sang barangay.
Ginpasalamatan naman ini ni Carmona.
Samtang suno diri, hambalan nila sa session sang barangay sa maabot nga Mierkoles kun pila ang financial assistance nga sarang nila mahatag sa mga nasunugan.
Samtang nagapanawagan naman ang isa sa mga nasunugan nga si Rosa Naces kag Mayor Evelio Leonardia nga buligan sila nga makapatindog sang balay bisan bahay kubo na lang anay.
Suno kay Naces, tatlo gid sa ila nga pamilya ang nasunugan sang balay.
