Kumpirmado na nga babayi ang isa sa duha ka nagaka-agnas nga bangkay nga nasapwan sa parking area sang First Farmers Holding Corporation sa Brgy Dos Hermanas, Talisay City sang Biyernes.
Sa interview sang Bombo Radyo Bacolod kay Police Lt. Col. Alvin Christopher Baybayan, hepe sang Talisay City Police Station, ini suno sa kumpirmasyon sang Scene of the Crime Operation, nga amo ang nag-examine sa bangkay.
Ang babayi amo ang biktima nga nakasuksok sang itom nga bayo, denim short, Lacoste-brand nga underwear kag may knitted nga sling bag; samtang lalaki naman ang bangkay nga wala sang pang-ibabaw nga panapton kag nakadenim shorts.
Suno kay Baybayan, tubtob sa karun, wala pa sang pamilya nga nagdangop sa Talisay City Police Station agud kilalahon ang mga biktima.
Negatibo man ang ila pagtsekyar sa missing persons sa Talisay City, gani nagapati nga residente sa iban nga banwa ukon ciudad ang mga biktima.
Dugang pa sang hepe nga sa ila back tracking, wala sang may nakuha sa mga CCTV nga nagsulod nga salakyan, motorsiklo ukon tawo nga mahimo maangot sa insidente.
Samtang wala na sang iban pa nga recoveries sa crime scene magluwas sa live ammunition ukon wala magamit nga bala sang cal. 38, samtang may mga tattoo naman sa lawas ang duha ka biktima.
Padayun ang panawagan ni Baybayan sa mga may himata ukon abyan nga missing nga makig-angot sa ila agud makabulig sa pag-identify sang mga biktima.
