(Update) Nakilala na ang isa sa tatlo ka mga gina-alegar miyembro sang New People’s Army nga napatay sa engkwentro sa tunga sang 79th Infantry Battalion sang Philippine Army kag sang komunista nga grupo sadtong Abril 17 sa banwa sang Calatrava.
Ginkumpirmar sang commander sang 303rd Infantry Brigade nga si Brigadier General Benedict Arevalo sa interview sang Bombo Radyo Bacolod nga ginkilala ang isa ka napatay nga si Sulpicio Hernan Jr. sang Barangay Bago banwa sang Salvador Benedicto.
Suno kay Arevalo, gina-verify pa nila kun taga-Negros Oriental ang duha ka mga napatay bangud nakabaton sila sang impormasyon nga lunsay naga-hambal sang Cebuano ang mga ini.
Indi naman masiguro ni Arevalo kun nakuha na ang bangkay sang tatlo nga gindala sa isa ka punerarya sa syudad sang San Carlos.
Nagapanawagan naman ini sa tanan nga mga taga-Negros Oriental nga makig-angot sa ila kun may himata sila nga wala pa nakapauli.
Sa subong, padayon pa ang clearing operations sang Philippine Army sa Barangay Marcelo sa diin natabo ang engkwentro apang wala naman sang dapat nga kahangaw-an ang pumuluyo bangud bantay-sarado na ini sang mga suldado.
Ginapalab-ot man ni Arevalo sa NPA nga kun indi nila masarangan ipabulong ang iban nila nga miyembro nga napilasan sa natabo nga engkwentro, mahimo nila nga i-surrender ang mga ini sa Philippine Army agud mapabulong.
