Ginsuguran na ang 10-day voter’s registration sa Bacolod City para sa Barangay and Sangguniang Kabataan Elections subong nga adlaw tubtob na sa Agosto 10.
Alas-8:00 kaina sang aga, madamo na sang mga nagapila agud magparehistro sa Commission on Elections (COMELEC) sa ginpatigayon nga satellite registration sa North Block sang SM City Bacolod.
Sa schedule nga ginpagwa sang COMELEC-Bacolod ang registration ang patigayunon sa SM City Bacolod North Block sa Agosto 2, 4 kag 5 halin alas-8:00 sang aga tubtob alas-5:00 sang hapon.
Sa Robinson’s Place Bacolod naman ang registration sumugod sa Agosto 6 tubtob 10, sa parehas nga oras.
Sa Agosto 3, may-ara naman sang exclusive registration sa Metro Bacolod District Jail sa Barangay Singcang-Airport kag sa Office of the Senior Citizens Affairs sa Bacolod City Public Plaza.
Sa Agosto 4, may-ara man sang exclusive registration sa Metro Bacolod District Jail sa Barangay Handumanan.
Ginapahanumdom naman nga wala nagabatun ang COMELEC-Bacolod sang application for transfer sa lain man nga Barangay ukon transfer sa lain nga ciudad ukon banwa.
Ang voter’s registration area sa SM City Bacolod, ang wala sa main building, sa baylo ang entrance ang yara sa kilid sang pasilidad malapit sa pwesto sang Temporary Manokan Country.
Samtang gin-updan naman sang iloy ang iya 18 anyos nga bata nga babayi sa pagparehistro.
Sa interview sang Bombo Radyo Bacolod kay Alyas Lei, sang Barangay Estefania, ginpreparar na nila sang temprano ang mga kinahanglan sa pagparehistro.
Ginpakamaayo naman sini ang proseso, kasubong man ang venue nga mas malapad kag mabugnaw kun ipaanggid sa Bacolod-Comelec Office.
Suno sa iloy, nabasahan lamang nila sa social media nga nabuksan na ang voter’s registration.
Gin-updan sini ang iya bata, bangod luyag man sini nga magamit sang iya bata ang kinamatarong sini nga makaboto kag makapili sang nagakaigo nga lider nga magapamuno sa Barangay.
SAMTANG….Naghatag sang mga pahanumdom ang Bacolod City Election Officer agud indi na magbalik-balik pa ang mga magaparehistro agud makaboto sa Barangay and Sangguniang Kabataan Elections.
Sa interview sang Bombo Radyo Bacolod kay Atty Kathrina Trinio Caña, ginklaro sini nga wala sila nagabatun sang application para sa pagtransfer sang voter’s registration, sa pagsaylo man sa lain nga barangay ukon pagsaylo sa lain nga banwa ukon ciudad.
Ini bangod may pila pagid ka mga botante nga nagapasimpalad kag nagakadto sa ila satellite registration.
Samtang aminado man ini nga sa una nga adlaw sang voter’s registration sa SM City Bacolod North Block, madamo man sang mga nagabalik bangod kulang ang requirements.
Pahanumdom sini nga dapat napreparar na ngadaan ang mga kinahanglan kaangay sang photocopy sang IDs para sa mga regular voters, samtang required naman ang photocopy kag original nga birth certificate sa mga 15 tubtob 18 anyos.
Suno diri, 500 ka regular voter’s ang ila icater subong nga adlaw, samtang wala naman sang limit sa batunon nga priorities kaangay sang senior citizen, persons with disability kag nagabusong, bangod sila ang magabatun tubtob nga masarangan.
I-assess man nila ang kalawigon sang proseso kag kun sarang pa nga madugangan, pasakaan man nila ang numero sang batunon sa mga masunod nga inadlaw sang registration.
Magluwas sa mga exclusive registrations sa mga jail facilities kag sa mga senior citizens, sa mall ginpili nga patigayunon ang satellite registration agud mas madamo ang maakumodar kag convenient man para sa mga magaparehistro.
Suno diri, magluwas nga magamay ang Commission on Elections (COMELEC) – Bacolod City Office, mayab-ok, mainit kag wala man sang pasilungan ang mga nagapila sa gwa.
Samtang sa mall, magluwas sa mga nagapila sa gwa nga nagatilindog, pagkasulod sa pasilidad sila ang may mapungkuan na.
Sa karun, ang registered voters sa Bacolod City ang nagadangat sa 355,880, kag Barangay Mansilingan ang may pinakamadamo nga botante.
Interview kay Alyas Lei, new registrant voter
Interview with Bacolod Election Officer Atty Kathrina Trinio Caña
