Napasakaan na sang kaso nga human trafficking ang 10 ka Chinese nationals nga nadakpan nga involved sa paghimo sang illegal nga sigarilyo sa Purok Rosas, Barangay Calumangan, Bago City, Negros Occidental, sang Abril 21.
Ang mga nadakpan amo sanday Fugong Jiang; Wu JianQun ; Xu Ke; Li Hong; Ye Jun; A Yac; Tan Jing; Wu Shaobin kag Eron Chen samtang si Pan Zongxing naman ang at-large kag lunsay mga residente sang nasambit nga lugar.
Samtang may mga Pilipino man nga nadakpan nga amo sanday Lino Pasculado, 53 anyos, residente sang Brgy. Matab-ang, Talisay City; Jasper Jonh Bais, 28 anyos, residente sang Capitol Heights, Brgy. Villamonte, Bacolod City; Romeo Mahinay, 56 anyos, residente sang Sitio Tubod, Brgy. Macagahay, Moises Padilla, Neg. Occ; kag Remar Aballa, 16 anyos, residente sang Brgy. Mabira, Sagay City.
Madumduman nga sang Biyernes, ginbisita ni Interior Secretary Jonvic Remulla ang lugar kun diin ginahimo ang mga illicit nga sigarilyo kag suno diri ang mga machines nga narekober ang ipaguba na gid lamang kag indi na pag-idisplay pa.
Samtang, suno kay Criminal Investigation and Detection Group (CIDG) Director PMGen. Robert Alexander Morico II, natigayon nila nga marescue ang isa ka menor de edad nga wala ginabayaran sang husto sa pagtrabaho kag wala pa ginapahanugotan nga maggwa sa compound.
Sa karun napasakaan na sang kaso nga human trafficking ang mga Chinese nationals samtang ginatun-an pa kun ano pa gid nga kaso ang madugang nga mapasaka batok sa ila.
