Opisyal na nga ginturn-over ang 10 ka mga electric operated patrol vehicles nga gindonar sang Bacolod Local Government Unit (LGU) para sa Bacolod City Police Office (BCPO) sa Bacolod City Government Center kahapon sang aga, Abril 27.
Suno kay Bacolod City Mayor Greg Gasataya, ang tagsa ka e-vehicles ang nagabalor sang P1.4 million.
Samtang, patigayunon naman subong nga adlaw ang technical transfer kun sa diin ang manufacture sang salakyan ang magahatag sang instructions kun paano ang husto nga paggamit kag pag-maintain sang mga e-vehicles.
Paathag sini nga indi pwede nga bisan sin-o lang ang magamaneho sini kag may ara diri sang duha ukon tatlo ka mga designated personel nga magamaneho.
Nagalaum naman ini nga mas mapabaskog ang pagpatrolya sang kapulisan sa ciudad.
Pahanumdom sang Alkalde nga halongan ang salakyan kag indi pwede personal nga gamiton ang mga ini.
