Patay ang indi magnubo sa napulo ka sibilyan samtang siyam naman ang pilason, matapos naglunsyar sang airstrikes ang Pakistan sa duha ka Afghan province, santo sa Afghanistan kag the United Nations kahapon.
Ang nagapadayon nga cross-border conflict sa tunga sang duha ka nasambit nga pungsod ang wala gid nagapakita sang sensyales nga mauntat na ang kinagamo.
Suno sa Ministry of Information sang Pakistan, gin-target nila ang mga hideout sang militante nga grupo sa duha ka lokasyon kag santo sa ila inisyal nga report, 22 ka militante ang napatay.
Wala naman ini naghatag sang direkta nga komento sa report nga may naulamid nga sibilyan.
Ginkumpirmar sang United Nations mission sa Afghanistan nga lakip sa napulo ka napatay ang mga kabataan, sa southern province sang Helmand kag sa eastern province sang Kunar.
Madugay na ang konflikto sa tunga sang duha ka pungsod sa diin padayon nga nagabaylohanay sang opensiba kag tubtob subong wala gihapon nagaka-resolba ang isyu sa cross-border.
