BACOLOD CITY — Ginalantaw sang bise-alkalde sang ciudad sang Bacolod nga dako nga problema ang indi pagkooperar sang mga barangay officials kag mga residente kun nga-a nagadata ang iligal nga druga sa tagsa ka mga barangay.
Ini ang reaksiyon ni Vice Mayor El Cid Familiaran kasunod sang pahayag ni Philippine Drug Enforcement Agency (PDEA) Director Elyvenson Plaza nga 100 porsyento sang kabarangayan sa Bacolod ang apektado sang iligal nga druga.
Ang pahayag ni Plaza ang kasunod sang paglunsiyar sang Sabado sa Bacolod Government Center sang “Rehabinasyon,” ukon ang gintingob nga “rehabilitation” kag “nation,” nga programa sang gobyerno ukon kampanya kontra iligal nga druga.
Suno kay Plaza, 36 barangays sa Bacolod ang moderately affected samtang 25 naman ang slightly affected sang iligal nga druga.
Bangud sini, luyag ni Vice Mayor Familiaran nga i-activate ang Barangay Anti-drug Abuse Council (BADAC) kag mangin dedikado sa kampanya kontra druga.
Ginhatagan pagtamod sang bise-alkalde nga aktibo ang City Anti-drug Abuse Council (CADAC) apang nagadata ang iligal nga druga sa barangay bangud nga wala sang kooperasyon ilabi pa sa mga barangay officials nga nahadlok balusan sang mga drug personalities.
Samtang, madumduman nga tinalikdan nga tuig gindeklarar na ang Barangays 41, 5 kag 24 nga drug-free apang wala ini nadayon bangud nga wala ini ginkilala sang PDEA bangud sang kakulang sang pirma sa mga dokumento kag kadungan man sang pag-abolish sang Negros Island Region.
