Ginkumpirmar sang pinuno sang Department of Interior and Local Government (DILG) Bacolod nga nagsugod na kahapon, Agosto 23 tubtob sa Disyembre 31 ang 105 ka mga contact tracers nga ginrehire sang ciudad.
Sa interview sang Bombo Radyo kay DILG Head Ma. Joy Marideth Madayag, ginpahayag sini nga nagpatigayon sila sang orientation sa mga contact tracers kahapon sa Bacolod Government Center kun sa diin ginpahanumduman ang mga ini sang importansya sang ila trabaho subong man sang ila kaluwasan.
Suno kay Madayag, sila ang mga naretain nga nauna nga mga contact tracers nga ginhire sang ciudad sang nagsugod ang COVID pandemic.
Gintunga ang mga ini sa apat ka team kag ginpangdesignate sa nagkalain-lain nga bahin sang ciudad.
Yara naman sa P18,870 ang sweldo nga ila mabaton kada bulan.
Suno diri, makit-an man nga desidido ang mga ini sa ila trabaho.
Gindugang man sang DILG head nga kinahanglan gid ang ila nga serbisyo bangud madutay lang ang mga miyembro sang Philippine National Police kag Armed Forces of the Philippines nga nagapatigayon sang contact tracing.
