Ginkompirmar sang executive director sang Bacolod Emergency Operations Center nga nag-abot na ang 10 thousand dose sang Pfizer vaccine para sa mga kabataan nga nagaedad sang 5 tubtob 11 anyos.
Sa interview sang Bombo Radyo Bacolod kay Em Ang, ginpahayag sini nga nag-abot na ang bakuna nga para sa mga nasambit nga age group.
Suno diri ang bakuna ang ginformulate para sa mga kabataan kag gin-athag man sini nga boluntaryo lamang ang pagbakuna.
Ang vaccination para sa nasambit nga age group ang magaumpisa sa Lunes kag ginalantaw sang EOC nga mabakunahan ang kapin 5 mil ka mga kabataan sa sulod sang una nga semana.
Nahibaluan nga sa February 14 tubtob 15, 2022 patigayunon ini sa Corazon Locsin Montelibano Memorial Regional Hospital kag Bacolod Queen of Mercy Hospital alas 09:00 sang aga tubtob alas 04:00 sang hapon.
Sa February 14,15 kag 16 sa Riverside Medical Center samtang sa February 16, 2022 patigayunon naman ini sa City Health Office.
Sa February 17, 18 kag 19 2022 patigayunon naman ang vaccination sa nasambit nga age group sa St. John Institute kag STI West Negros University.
Suno kay Ang ginaengganyo lamang ang mga ginikanan sang mga kabataan nga nagaedad sang 5 tubtob 11 anyos nga magpabakuna agud makakuha sang nagakaigo nga proteksyon batok sa COVID-19 apang wala man ang mga ini ginapilit nga pabakunahan ang ila mga kabataan.
Nagpanugyan man si Ang, nga apisar nga naganubo na ang kaso sa syudad padayunon sa gihapon ang pagsunod sang minimum health protocols batok sa COVID-19.
