Patay ang 11-anyos nga bata nga babayi samtang ginapangita pa ang iloy sini matapos nalumos sa suba sa Purok Crossing Libertad, Brgy Ma-ao, Bago City pasado-ala 1:00 kahapon sang hapon.
Sa interview sang Bombo Radyo kay Dr. Merijene Ortizo, head sang Disaster Risk Reduction and Management Office (DRRMO) – Bago City, nagapanglaba si Myra Gargasiran kaupod ang bata sini nga si Ma. Ella Gargasiran, 11-anyos sa suba malapit sa ila puluy-an.
Suno kay Ortizo, lab-uton kuntani ni Ma. Ella ang tsinelas sini nga naglutaw sa tubig kag nagbulig man ang iloy sini apang bangud sa mabaskog nga current, sila ang naanod.
Nabaton sang Bago-DRRMO ang report sa insidente ala-1:41 sang hapon kag gilayon nga ginrespondehan.
Alas-4:40 kahapon sang nasapwan sang isa ka volunteer si Ma. Ella sa ubos kag mga batuhon nga bahin sang Taytay California sa nasambit man nga barangay apang wala na ini sang kabuhi.
Temporaryo naman nga gin-untat ang pagpangita sa iloy kagab-i para sa seguridad sang mga responders bangud madulom na kag makusog ang tubig.
Magaresume naman ang search kag retrieval operation alas-7:00 subong nga aga.
Ang padre-de-pamilya ang nagatrabaho sa kampo sang natabo ang insidente kag sang nakit-an na ang bata, siya man ang nag-identify diri.
Suno sa Bago City DRRMO, ala-1:00 pa lamang sang hapon nagpanawagan na sila sa mga pumuluyo nga may yara sang advisory sang makusog nga ulan kag pagpangilat.
