Patay ang 11 anyos nga bata nga lalaki matapos maigo sang kilat sa sulod sang ila balay sa Hacienda Pitugo, Barangay Granada, Bacolod City kapin alas-3:30 kahapon sang hapon.
Sa interview sang Bombo Radyo Bacolod sa iloy nga si Marivic Palic, una na nga nag-ulan sang madamol apang naghulaw kag kaangay nga nagkalma ang tiyempo, apang didto naman nagsigabong ang mabaskog nga kilat.
Suno diri, una nga nag-igo ang kilat sa puno sang marang, kag ini ang nagbanda pasulod sa ila nga balay.
Pahayag sini nga sila ang ulupod nga nagahigda sang magbangon ang iya 11 anyos, Grade 6 pupil, nga subang sa lima ka mag-utod, agud kuntani mangihi sang siya ang maigo sang nagdeflect nga kilat.
Suno diri, sa tiil nag-igo ang kilat kag siya ang nagtabog.
Pahayag sang iloy nga dead on the spot ang iya bata, bangod sa dako nga boltahe, kun sa diin nagkalayo ang lawas sang iya bata.
Si Marivic ang nagabusong sa karun sang iya ika-anom nga baby.
Siya ang nagapangayo sang bulig sa pagpalubong sa iya bata.
Madasig naman nga nagpalab-ot sang bulig ang Barangay Granada sa pamilya.
Sa interview sang Bombo Radyo Bacolod kay Punong Barangay Armando Vito, siya mismo ang nag-asikaso agud maproseso sa punerarya ang lawas sang bata.
Ginalantaw sini nga bwas madala na sa ila puluy-an ang bangkay sang biktima.
Nagpadala man ini sang financial support agud nga may magamit ang nalisdan nga pamilya.
