Natalana naman nga pasakaan sang kaso sang kapulisan ang isa ka tiyo nga gina-alegar naghimulos sa iya 11-anyos nga hinablos sa ciudad sang Bago.
Sa interview kay Police Staff Sergeant Jennyvev Biasa, ang head sang Women and Childrens Protection Desk (WCPD) sang Bago City Police Station kag temporaryo man nga WCPD head sang Pulupandan Municipal Police Station, ipaagi na lang nila sa regular filing ang kaso batok sa 49-anyos nga suspek nga gin-alegar naghimulos sa iya hinablos sa Purok Bulak sang Bulak, Brgy. Poblacion, Bago City.
Apang tumandok sang Pulupandan ang biktima kag nagakadto lang sa balay sang iya tiyo.
Santo sa imbestigasyon ni Biasa, alas-2:00 sang kaagahon sang Oktubre 27 sang ginhimuslan sang tiyo ang iya hinablos.
Matapos ang insidente, nagpanugid ang biktima sa iya utod kag nag-ayo ini nga ipauli siya sa Pulupandan kag natigayon ini sang sang Noviembre 1.
Nahisayran nga naga-trabaho sa luwas sang pungsod ang iloy sang biktima.
Utod sang iloy sang biktima ang ginatudlo nga suspetsado sa krimen.
