Onse na ka barangay gikan sa tatlo ka Local Government Unit sa probinsya sang Negros Occidental ang nagreport nga apektado na ang mga ini sang dry spell.
Ini ang ginalakipan sang ciudad sang Himamaylan, banwa sang Cauayan kag banwa sang Isabela.
Santo sa report nga ginpagwa sang Office of the Provincial Agriculturist, walo ka mga barangay ang apektado ang humayan bangud sa dry spell, sa banwa sang Cauayan duha ka barangay ang apektado samtang ang banwa sang Isabela may yara sang isa ka barangay nga apektado.
Nagdangat sa 59.22 hectares ang kabug-usan nga humayan ang apektado sa ciudad sang Himamaylan kag 75 ka mga mangunguma ang apektado kag ang total damages ang nagdangat sa P2,414,586.00 samtang sa banwa sang Cauayan, 52 hectares ang kabug-usan nga humayan ang apektado kag 67 ka mga mangunguma ang apektado kag ang total damages ang nagdangat sa P4,105,000 kag ang sa banwa sang Isabela ang may reported nga 117.22 hectares kag 143 ka mga mangunguma ang apektado kag ang total damages ang nagdangat sa P7,079,836.
Suno kay Negros Occidental Governor Eugenio Jose “Bong” Lacson, ang mga apektado nga humayan ang ginatsekyar pa sa karun kun covered sila sang crop insurance kag kun covered mahimo sila nga mabayran.
Samtang nagapanawagan man ang gobernador nga ipacover na ang ila nga farm sa crop insurance agud nga may proteksyon ang mga ini batok sa kalamidad.
Samtang, nakapain naman ang probinsya sang budget nga P15 million para sa mga maapektuhan sang El Niño.
Una na nga nagpaandam ang PAGASA nga sa una nga quarter subong nga tuig ang Pilipinas ang makaeksperyensya sang El Niño.
