Nakapauli na ang 11 ka mga sakay sang nagkulob nga motorbanca sa baybayon nga sakop sang Bago City alas-5:30 kagab-i, Mayo 15.
Sa interview sang Bombo Radyo kay Commander Artzell Anacan, Commander sang Commander sang Coast Guard Station Northern Negros Occidental, alas-11:30 kagab-i na-discharge na ang mga biktima sa ospital kag gindul-ong sang Local Government Unit sa ila puluy-an sa Barangay Binobohan.
Suno diri, ang siyam sa 11 ka mga pasahero ang miyembro sang Sauital family samtang duha diri ang mga crew.
Kalakip diri ang pito ka tuig nga bata kag isa ka senior citizen.
Pahayag sini, ginsugat sang duha ka crew ang magpamilya sa Bantayan, Bago kun sa diin tuyo sang mga ini nga magkadto sa lubong sang ila himata.
Suno kay Anacan, santo sa pahayag sang isa ka crew, samtang nagabyahe sila halin sa Bago padulong sa Guimaras hinali nga na-utod ang tarrik rason nga nagkulob ang bangka.
Suno diri, pasado alas-7:00 natigayon nga na-rescue ang mga biktima kag gindala sa Bago City Hospital agud mahatagan sang atensyon medikal.
Sa karun, ang mga ini ang yara na sa maayu nga kahimtangan.
Nagapadayon naman ang imbestigasyon sang mga otoridad agud matsekyar kun may permit ang amo nga bangka.
Mensahe ni Anacan sa publiko nga ginadumilian ang pagbiyahe sang mga passenger vessel kun wala sang permit.
