Onse ang pilason matapos nga matumba ang Jeep nga may ruta nga Pulupandan-Bacolod sa Sitio Mambucano,Brgy.Cabatangan,Talisay City kaina sang aga.
Sa interview sang Bombo Radyo Bacolod kay Police Major Rhazl Jim Jocson, Deputy Chief of Police sang Talisay City Police Station, may nagluntad nga aksidente kun sa diin imbulbado ang isa ka depampasahero nga salakyan nga ginamaneho ni Ian Mula, 49 anyos kag residente sang Barangay Patic, Pulupandan, Negros Occidental.
Suno kay Jocson, ang lugar sang insidente ang kurbada kun sa diin nagchange gear ang driver sa primera apang wala ini nagkagat gani naalang-alang kag nag-atras ini rason nga nadulaan sang control kag natumba ang jeep.
Napilasan ang 11 ka mga sakay sa jeep apang minor injuries lamang kag ginahulat nalang ang xray result sang isa ka bata.
May tatlo nga gindala sa Talisay City Health Office kun sa diin minor injuries lamang kag kalakip na diri ang bata nga ginpaidalom sa xray ang iya nga kamot.
Ang sakay sang jeep ang magapadulong kuntani sa Guerrero Farm and Nature Park sa nasambit nga ciudad.
Lima sa sakay sang jeep ang mga menor de edad.
Ginahulat nalang sang Talisay City Police Station kun may yara sang magpasaka sang reklamo kasunod sang nagluntad nga aksidente.
