119 ang mga critical areas ukon red zone nga natumod sa meeting nga ginpatigayon ni Bacolod City Mayor Alfredo “Albee” Benitez may kaangtanan sa nagluntad nga sunog sa Purok Magnolia, Barangay 7, Bacolod City.
Ginpanugyan sang alkalde nga dapat may-ara sang drone ang tagsa ka Barangay agud makita ang geographic area sang ila lugar kag matumod kun diin ang mga pamalay nga naga-inikit ikit kag madasig maglapta ang kalayo
Isa man sa ginaduso nga dapat may-ara gid sang fire lane agud nga may maplastaran ang mga fire trucks kag indi mabudlayan inkaso nga may sunog.
Ginaduso man ang pagtukod sang mga hydrant sa 119 ka mga red zones, agud madasig ang pag-access sang tubig.
Nahibaluan nga 135 ang kabug-usan nga hydrants sa syudad sang Bacolod apang 30 lamang sa mga ini ang may nagakaigo nga water supply.
Nahibaluan nga nangin kabudlayan sa pagresponder sa sunog sa Barangay 7 ang manubo nga supply kasubong man ang mahina nga water pressure kun sa diin ang fire truck sang Amity ang nagdangat pa sa 30 minutos tubtob isa ka oras antes napuno apisar sa emerhensya.
Plano naman nga makighinun-anon ni Benitez sa pamunuan sang Prime Water agud madiskusyunan kun ini ang sakop sa ila nga responsibilidad.
Bangod sa kakulang sang water supply kag manubo nga water pressure sa pila ka mga hydrants, ginaduso sang alkalde ang paggamit sang water tanker nga amo ang magarefill sa mga fire trucks sa tion sang sunog.
Pinaagi sini, indi na kinahanglan nga magbalik balik pa sang fire truck sa pwesto sa pagkuha sang tubig.
Panindugan sini nga kinahanglan ang kooperasyon sa Bureau of Fire Protection, City Disaster Risk Reduction Reduction and Management Office, Department of Social Services and Development kag local government unit.
May ginapatigayon man nga Oplan Ligtas Pamayanan ang BFP Bacolod nga nagatrain sang mga volunteers sa tagsa ka Barangay, ukon City Fire Auxillary Group.
Ginapanugyan man ni Benitez nga mahamtangan sang fire extinguizer ang tanan nga Barangay Hall sa syudad kasubong man drum sang tubig agud magamit nga pangtapna sa early stages sang sunog.
