Nagapadayon ang pagpangita sang Talisay City Disaster Risk Reduction and Management Council kag Bureau of Fire Protection sa 12 anyos nga bata nga babayi matapos ginreport nga nalumos kahapon sa suba nga sakop sang Purok Santol, Barangay Zone 15, ciudad sang Talisay.
Ginkilala ang nalumos kay Mae Ann Suplemento, residente sang Purok Mahimayaon, Barangay Bata, ciudad sang Bacolod.
Sa interview sang Bombo Radyo Bacolod kay Rowela Delagao, iloy sang biktima, kaupod sang biktima nga nagpadulong sa suba ang isa ka utod sini kag apat ka mga abyan sini apang wala naglisenya sa iya kun sa diin magkadto.
Sa group chat lamang ang mga ini naghagaray nga magpaligo.
Sang tinalikdan nga gab-i pa lang naghambal na ini sa iya nga mga kabataan nga indi na magpalagaw agud nga makalikaw sang mga disgrasya.
Suno kay Rowena, naghagaray ang mga bata sini kag iban nga upod nga magpaligo sa suba kag libre sang isa isa nila kaupod.
Indi pa ini kuntani magubra kahapon apang ginpilit sini ang iya nga kaugalingon nga trabaho.
Suno kay Rowena, wala gid ini nagkulang sa pagremind kag pagpaandam sa iya mga kabataan apang wala ini napamati.
Natingala man ini nga makita sini samtang nagalakat padulong sa suba kun sa diin nagluntad ang insidente.
Ginpahayag naman ni Rowena Suplemento nga ginhagad sila sang ila nga abyan nga magpaligo sa suba bangud libre sini.
Suno diri, wala na sila nagpahibalo sa ila nga iloy antes maglakat.
Si Mae Ann lamang ang nagpaligo kaupod sang ila nga mga abyan apang mahimo nga nakadanlog ang mga ini kag nagbutungay.
Gintestingan man sang mga ini nga buligan ang manghod sini kag iya nga mga kaupdan paagi sa kahoy apang wala nila malab-ot.
Sa ulihi, may yara naman sang duha ka mga nagpanglaba nga nagbulig nga masalbar ang mga upod nila nga naglangoy apang duha lang ila nga narescue kag ang manghod sini ang gin-anod sang tubig patunga sang suba.
Sa karun padayon pa nga ginapangita si Mae Ann.
