Natalana nga pasakaan sang kaso subong nga adlaw ang 40 anyos nga lalaki matapos ginhimuslan ang 12 anyos nga babayi sa Barangay 40, Bacolod City.
Suno kay P/Capt. Portia Nillosan, head sang Women and Children’s Protection Desk (WCPD) sang Bacolod City Police Office, magkaupod sa isa lamang ka boarding house ang 12 anyos nga Grade 7 student kag ang suspetsado nga isa ka fried chicken vendor.
Apang wala naman sa amo nga boarding house ang iloy sang biktima bangod ini ang nagpadulong sa lola sang bata.
Suno kay Nillosan, ginahagad ang bata sa pagpadulong sa iya nga lola apang ini ang naadlawan sa pagbugtaw gani wala naka-upod kag napabilin na lamang sa boarding house.
Samtang sa paglabay sang bata sa kwarto sang suspetsado, hinali na lamang ini nga gintawag.
Bangod naghulam man ang suspect sang charger sang tinalikdan, wala naman naalarma ang bata kag nag-upod diri kun sa diin ginpadala pa sini ang tsinelas sang bata sa pagsulod sa kwarto.
Didto na kag ginbuhat sang suspetsado ang iya malain nga tinutuyo kun sa diin gintayaan sini sang kutsilyo ang biktima, gin-ubahan kag iya nga ginhimuslan.
Nakapaidalum naman sa medico legal ang bata samtang yara na sa kustodiya sang Bacolod Police Station 6 ang suspetsado kag ginatinguhaan nga mapaidalum sa inquest proceedings subong nga adlaw.
