Gintupok sang kalayo ang pila ka mga balay sa Bangga Pari, Home For the Blind, sa Barangay Mansilingan, ciudad sang Bacolod, kapin ala 1:00 sang hapon, kahapon.
Sa interview sang Bombo Radyo kay Flordeleza Miranda, tag-iya sang balay nga una ginluntaran sang sunog, ang rason sa nagluntad nga sunog amo ang kuryente sa likod sang ila balay.
Suno diri, bangod nga isa lang sila ka dingding sa balay sang iya man nga bata, naglapta ang kalayo.
Sa inisyal naman nga report, sa interview sang Bombo Radyo kay Barangay Kagawad Panny Gauzon, 12 ka balay kag 12 ka pamilya ang nasunogan samtang ang iban wala pa na narecord bangod nga iabn ang nagbakasyon kag wala pa napahibalo nga nasunog ang ila balay.
Sa bahin naman ni Gauzon, sa iya pagkahibalo, butane ang ginhalinan sang sunog.
Samtang, nagpasalig naman si Punong Barangay Inday Franz Gasataya, nga magabulig ang barangay sa tanan nga nangin biktima sang sunog.
Sa interview sang Bombo Radyo kay Punong Barangay Inday Franz, temporaryo nga magatinir sa Barangay Gym ang mga bitkima sang sunog.
Suno diri, magluwas sa food packs nga ihatag, tinguhaan man sang barangay nga mahatagan sang assistance ang mga biktima sa ila nagapanguna nga kinahanglan.
Samtang, wala naman sang kaswalidad sa nagluntad nga sunog.
