Ginquarantine ang 12 ka mga rescuers nga nagresponde sa aksidente nga nagluntad sa tunga sang isa ka ambulansya, Montero Sport kag delivery van sang Nobyembre 11, matapos ma-expose sa isa ka COVID positive patient.
Sa nasambit nga mga rescuers, apat diri ang nagikan sa Bureau of Fire Protection – Bacolod, apat nagikan sa EMR (Emergency Medical Responders) Raptor kag apat halin sa Chamber Volunteer Fire Brigade (CVFB).
Suno sa pinuno sang CVFB nga si Bryant Lao, duha sa ila mga rescuers ang nagsulod sa ambulansya samtang duha naman ang nagdul-ong sa pasyente sa Corazon Locsin Montelibano Memorial Regional Hospital matapos ang aksidente.
Samtang, suno naman kay BCPO Spokesperson Pl. Lt. Col. Ariel Pico, wala sang police officer nga nakaclose contact sa positibo nga pasyente.
Suno diri, apisar nga nagresponde ang personnel sang Bacolod Police Station 1 sa aksidente, yara lang sila sa higad agud icordon ang area.
Suno sa iya, ang mga rescuers nga nagasuksok sang PPEs ang nag-atipan sa pasyente kag tatlo pa ka mga biktima sa ambulansya.
Madumduman nga nadulaan gid sang kabuhi ang driver sang ambulansya sang South Bacolod General Hospital samtang pilason ang tatlo ka sakay sini matapos mabungguan sang isa ka Montero Sport kag nagbunggo man sa isa ka delivery van sa area sang San Sebastian – Lacson Street, Bacolod City sang tinalikdan nga Miyerkules.
