Nakumpleto na sang provincial goverment sang Negros Occidental ang 12 ka Provincial core roads sa idalom sang Provincial Engineer’s Office kag Philippine Rural Development Project (PRDP) nga may kalabaon nga 10.31 km samtang nagapadayon na man ang construction sang pito ka mga core roads nga may ginpain nga pondo P100 million kag iban pa nga road networks nga may ginpain nga P74 million nga pondo.
Sa State of the Province Address (SOPA) ni Governor Eugenio Jose “Bong” Lacson, ginpahayag sini nga na-tigayon man nila ang pagbutang sang kuryente sa Bonbon Village Resettlement Site, Phase 3, sa Brgy. E. Lopez ciudad sang Silay nga nagabalor sang P4.3 million samtang ang construction sang P62.8 million nga Himogaan Bridge sa Brgy. Puey, ciudad sang Sagay ang malapit na lamang nga matapos.
Ginreport man sang gobernador sa iya nga SOPA, nga naumpisahan na man ang pagpaubra sang Municipal Slaughterhouse Projects sa mga local government units sang Cauayan, Toboso, San Carlos City, Binalbagan, Murcia, kag Hinobaan nga nagabalor sang P50 million kada LGU.
Dugang pa sa report sang gobernador nga ang nasambit nga proyekto ang may tinutuyo nga maka-produce sang matinlo nga karne paagi sa insakto kag matinlo nga pagdumala sa mga livestock animals.
Ginpasiguro man ang gobernador nga padayon sini nga suportahan ang mga mangunguma sa probinsya.
