Kritikal ang kondisyon sang 13 anyos nga bata bangud sa gin-agom nga serious physical injury matapos nga nabungguan sang salakyan sa atubang sang Purok Kamunsil, Barangay Banago, Bacolod City kahapon sang hapon.
Ginkilala ang biktima kay Christopher John Sandigan samtang ang gina-aligar nga nakabunggo amo si Michael John Chua, 43 anyos, kasado kag residente sang Alunan Baybay, Brgy. 34, Bacolod City kag isa ka tag-iya sang piggery.
Sa interview sang Bombo Radyo Bacolod kay Police Captain Armilyn Vargas, station commander sang Bacolod Police Station 3, suno sa imbestigador nagabike ang bata sa nasambit nga dalan kag may ginasundan nga tricycle kun sa diin nag-overtake ang salakyan kag sang nagbalik na ini sa iya lane, may nabatian ini nga naglagpok apang wala na sini nakita ang bata apang sang nagwa na ang negosyante sa salakyan natumba na ang bata.
Suno kay Vargas ginalantaw pa sa karun kun natumba ang bata bangud sa tricycle ukon nabungguan sang salakyan bangud matapos nga matumba sang bata gindala ini gilayon sa ospital.
Gindala naman sa Bacolod Police Station 3 ang driver sang salakyan nga gina-aligar nga nakabunggo sa biktima para sa dugang nga imbestigasyon.
