Gindala na sa government facility ang 13 anyos nga bata nga gin-alegar nga ginhimuslan sang tag-iya sang ila boarding house sa Barangay Taculing, Bacolod City.
Sa interview sang Bombo Radyo Bacolod kay Alma Gustilo, Officer-in-charge sa Department of Social Services and Development (DSSD), gin-estorya na nila ang amay sang menor de edad angot sa proseso kun sa diin kinahanglan nila nga maglayuanay para sa proteksyon sang bata.
Suno kay Gustilo, mas maayo nga yara sa pasilidad ang bata agud nga magiyahan sang maayo kag makarecover gikan sa iya inagyan.
Sa pahayag sang social worker, ang bata ang nagacomputer kag naubusan sang kwarta sang nakita sini ang ginatudlo nga suspetsado kun sa diin mahimo nga gintagaan ukon nagpangayo ini sang kwarta agud gamiton sa pagcomputer antes pa man natabo ang insidente.
Ginpahayag man ni Gustilo, makagwa lamang ang bata sa pasilidad kun maayo ang recovery sini kag kun napamatbatan na sang korte ang suspetsado.
Santo sa medical record sang bata wala man sang penetration sa kinatawo sang biktima apang may-ara sang insertion.
Ang pagpasaka sang criminal case batok sa suspek ang ginpaagi sa regular filing bangud wala ini mainquest antes pa man natapos ang reglementary period.
Nagpanugyan man si Gustilo sa mga ginikanan nga bantayan sang maayo ang mga menor de edad nga mga kabataan kag mangin vigilante sa palibot agud nga malikawan nga mabiktima ang mga ini sang kaangay nga kaso.
