Trese ka mga barangay sa probinsya sang Negros Occidental ang natalana nga ipaidalom sa deliberasyon sang regional oversight committee sang Western Visayas agud madeklarar nga drug-cleared.
Suno kay Nicholas Gomez, pinuno sang Philippine Drug Enforcement Agency Negros Occidental, nag-apply ang Barangay Biak na Bato kag Masulog sa La Castellana; Barangay 2, Barangay 8, kag Barangay Magballo sa Kabankalan City; kag Barangay Amayco, Buenavista kag Canlandog sa Murcia.
Candidate man para sa drug clearing ang Barangay Maricalum kag San Jose sa Sipalay City; Barangay Makilignit sa Isabela; Barangay Camalandaan, Cauayan; kag Barangay Tuburan, EB Magalona.
Suno kay Gomez, ginrekomendar sang PDEA nga mapaidalom sa deliberation ang 13 ka mga barangay kun sa diin kalabanan sa mga ini ang bag-o lang nag-apply.
Nagalaom naman ang PDEA Negros Occidental nga makapasar ang mga candidate barangays agud magdamo ang drug-cleared barangays sa probinsya.
Matapos ang deliberasyon bwas, magabaton naman ang PDEA sang dugang nga mga applicant barangays bangud mahimo nga may masunod nga deliberasyon sa bulan sang Hunyo.
