Trese ka mga pawnshop kag lending institution sa ciudad sang Bacolod ang nagalapas sa ordinansa nga nagarequire sa ila nga mag-install sang closed-circuit television (CCTV) camera.
Suno kay Bacolod City Police Office spokesperson Police Lt. Liberty Indiape, naggwa sa ginpatigayon nga security survey sa nagkalain-lain nga pawnshops kag lending institutions nga pila ka mga establisyimento ang wala naka-install sang CCTV camera.
Nagpadala sang sulat si BCPO director Police Col. Manuel Placido kay Permits and Licensing Division head Stella Rose Rayos angot sa resulta sang survey.
Nahibaluan nga nakabutang sa City Ordinance No. 600 Series of 2002 ang pagbutang sang CCTV camera bilang kabahin sang anti-criminality campaign.
Suno kay Indiape, nagagwa sa record sang BCPO nga pila ka mga pawnshops kag lending institutions ang ginatarget sang criminal elements ilabi na ang mga robbers.
Ang iban naman nga mga CCTV cameras ang defective ukon wala nagagana.
Suno kay Indiape, makabulig ang CCTV camera sa mga imbestigador nga masolbar ang krimen sa sini nga mga establisyimento.
Suno kay Bacolod City Vice Mayor El Cid Familiaran, mas maayo gid nga nagpatigayon sang security survey ang BCPO.
Suno sa bise alkalde, trabaho sang Permits and Licensing Office ang pag-inspect sa financial institution antes maghatag sang business permit agud masiguro nga may nainstall ini nga CCTV camera, santo sa ordinansa.
Ang CCTV camera suno kay Familiaran ang makabulig sa establisyimento, mga empleyado kag sa kliyente bangud may mareview nga footage pananglitan may matabo nga krimen.
