13 tanan ang mga market vendors ang nadakpan nga nagabaligya sang refilled butane sa Burgos Public Market sa joint inspection nga ginpatigayon sang Business Permit and Licensing Office, Bacolod City Legal Office kaupod ang mga personnel sang Bacolod Police Station 4 kalakip na si Burgos Public Market supervisor Cherry Aujero.
Ang mga ginpang-issuehan sang warning amo ang mga nagabaligya sang refilled butane may Mayor’s permit man sa pagbaligya sa merkado ukon wala.
Sa interview sang Bombo Radyo Bacolod kay Reah Rom, team leader sa BPLO inspection team, madamo sang mga butane canisters gikan sa mga market vendors.
Iban sa mga ini ang empty canister samtang may-ara naman sang narefill na.
Sa pag-upod sang Bacolod News Team sa inspection, nakita man nga iban sa mga nakumpiskar nga butane canister ang tuktukon na, nga nagapakita nga malawig na nga ginagamit sa pagrefill.
Suno kay Rom, sa ila nakaligad nga inspection, sila ang naka-identify sang 20 ka mga market vendor nga nagabaligya sang refilled butane sa nasambitan nga merkado, apang kaina apat sa mga ini ang nanirado na.
11 ang mga market vendors nga nakuhaan sang butane sa sulod sang Burgos Public Market, samtang may duha naman ka vendors nga nakumpiskaran sa gwa sang merkado.
Ginaklaro man nga ginkumpiskar gid bisan ang mga empty canister bangod ini ang mahimo ibalik lamang sang mga vendors sa supplier agud marefill.
Ang inspection ang ginpatigayon kasunod sang madamo nga mga sunog nga gintuga sang naglupok nga butane.
Suno kay Rom, iga-indorso pa sang BPLO ang ila nga record sa inspection partikular na sa una nga identify nga 20 ka market vendors sa City Legal Office.
Nahibaluan nga sa Bacolod City Ordinance No. 885, ginadumili ang pagtughong, baligya kag paggamit sang refillable butane cannister, kag ang magalapas ang may multa nga P3,000 tubtob P5,000.
Suno diri, nakadepende sa CLO kun sila ang maga-issue sang notice of closure sa mga market vendor.
Ang departamento man ang magastore sa nakumpiskar nga mga butane canister apang ginalantaw nga sila ang makig-angot pa sa Bureau of Fire Protection (BFP) ukon sa Department of Energy (DOE) sa kun paano ang proseso sa pagdispose.
