Kapin sa 13 ka mga banwa kag ciudad ang ginalantaw nga maapektohan sa posibilidad nga liwat nga paglupok sang bulkan Kanlaon kag isaka sa alert level 4 ang status sini.
Sa interview sang Bombo Radyo kay Office of Civil Defense- Western Visayas Regional Director Raul Fernandez, santo sa 24 oras nga monitoring sang Philippine Institute of Volcanology and Seismology (PHIVOLCS), may narekord nga 37 ka volcanic earthquakes kun sa diin may ginbuga nga 3,639 tonnes per day nga sulfur dioxide kag nagdangat sa 500 meters ang kataason sang plumes.
Bangod sini, wala sa gihapon ginapahanugotan ang pagpalupad sang bisan ano nga aircraft malapit sa bulkan sa posible nga pagluntad ang gulpyada nga paglupok sini, pagbuga sang lava, pag-ulan sang abo, rockfall, pyroclastic density current, kag lahar flow sa tion nga may pag-ulan.
Suno kay Fernandez, sang naglupok ang bulkan ilabi gid nga naapektohan amo ang banwa sang La Castella, kag ciudad sang La Carlota, Bago kag Canlaon.
Apang, kun magsaka sa alert level 4 ang status, posible nga kapin sa 13 ka mga banwa kag ciudad ang maapektohan kalakip na ang banwa sang Moises Padilla, Pontevedra, Isabela, La Castellana kag ciudad sang La Carlota, Bago, Canlaon, kag iban pa.
Isa sa ginatun-an pa sa karun amo nga kun diin saylohon ang mga evacuees sang banwa sang La Castella, kag ciudad sang La Carlota, Bago kag Canlaon pananglitan nga maglala ang sitwasyon.
