13 ka tablet kag isa ka laptop ang ginkawat sa sulod sang Talangnan Elementary School sa Sitio Talangan, Brgy 7, banwa sang Cauayan, Negros Occidental sa duha ka sunod-sunod nga adlaw.
Sa interview sang Bombo Radyo kay Police Lt Col Lowell Garinganao, hepe sang Cauayan Municipal Police Station, sang Nobyembre 11, kapin alas-3:50 sang kaagahon ginsulod sang kawatan ang buluthuan kag natigayon nga makawat ang anum ka tablet.
Apang, antes pa man ini, sang Nobyembre 9, kapin alas- 7:00 sang aga, natukiban nga ginkawat ang pito ka tablet kag isa ka laptop sang manunudlo.
Suno kay Garinganao, may yara sang watchman sa buluthuan kag ini ang nagatinir malapit sa kwarto nga ginkawatan.
Isa man sa palamangkotanon amo nga paano nga wala nabatyagan sang watchman ang pagpangawat bangod nga ginmartilyo ang pertahan kag pwersahan nga ginsulod.
May yara man sang CCTV sa buluthuan apang ini ang guba.
Ginapatihan sa karun nga kapin sa tatlo ang suspetsado sa pagpangawat samtang padayon pa ang imbestigasyon sang Cauayan Municipal Police Station.
