Opisyal nga ginbuksan ang 13th edition sang Winter Paralympics sang Biyernes sa Beijing paagi sa pagpanawagan sang kalinong nga kaangay sang kakusog sang kalayo nga nagarepresentar sa Games.
Gingamit ni International Paralympic Committee (IPC) president Andrew Parsons ang iya opening ceremony platform agud magpromote sang kalinong sa kalibutan samtang gindumilian naman ang mga atleta sang Russia kag Belarus sa pagpakigbahin sa kompetisyon bangud sa ila papel sa nagapadayon nga gyera sa Ukraine.
Suno kay Parsons, bilang isa ka leader sang organisasyon nga “inclusion” ang sentro, ginaselebrar ang diversity kag ginahakos ang kinaya, nagakasubo ini sa nagakatabo sa kalibutan sa karun.
Suno diri, ang 21st century ang tion para sa dayalogo kag diplomasiya kag indi inaway kag kainit.
Suno sa iya, nagapanawagan ang Paralympic Movement sa mga world authorities nga magtipon, kaangay sang mga atleta, kag magpromote sang kalinong, pag-intindi kag inclusion.
Gindugang man sini nga ang kalibutan ang dapat mangin lugar sa pag-unungay kag indi pagtunga.
Gintapos naman ni Parsons ang iya speech paagi sa isa ka tinaga, nga amu ang “Peace.”
Ginsuguran ang opening ceremony festivities paagi sa pagraise sang Chinese flag nga ginpangunahan sanday Chinese President Xi Jinping kag ni Parsons samtang nagatukar ang national anthem sang pungsod.
Nagsugod ang parade of nations sa Beijing National Stadium, nga kilala man bilang Bird’s Nest, sa atubang sang kapin 30 mil ka mga attendees.
