Patay na sang nakita ang 14 anyos nga bata nga lalaki nga nalunod sang Domingo, Setyembre 14, sa Campomanes Bay sa Barangay Maricalum, ciudad sang Sipalay, Negros Occidental.
Sa interview sang Bombo Radyo Bacolod kay Dionelo Bogtae, Executive Assistant For Operations sa ciudad sang Sipalay, ginkumpirmar sini nga nakita na ang namissing nga 14 anyos subong lamang nga gab-i, Setyembre 17.
Suno kay Bogtae, nakita ang bata sang crew sang isa ka tug boat nga nagdock sa pantalan sa bahin sang Campomanes Bay alas 7:45 ang takna sang gab-i.
Suno diri, nagautaw-utaw ang bangkay sang 14 anyos nga nalunod sang Domingo.
Pasado alas 08:00 ang takna subong nga gab-i nadala sa higad sang baybay agud mabiyahe padulong sa punerarya sang Sipalay ang bangkay sang bata.
Yara man ang presensya sang pamilya sang biktima sang ini ang nakita kag gindala sa punerarya.
Samtang sa pihak nga bahin, nagpatigayon naman sang evacuation sa pila ka mga lugar sa nasambit nga ciudad matapos nga ginbaha bangud man sa nagapadayon nga pag-ulan dala sang Habagat kag Bagyong Helen nga nakasulod na sa Philippine Area of Responsibility subong nga gab-i.
