Patay ang 14 anyos nga solterito matapos makadanlog kag maanod sa daludo sang tubig sa sapa sa Purok Bayabas, Barangay Lumapaw, Canlaon City, Negros Oriental kahapon sang aga.
Sa interview sang Bombo Radyo Bacolod kay Police Lt. Col. Sonny Los Baños Silva, hepe sang Canlaon City Police Station, ang solterito ang naglisensya nga magsaylo sang kanding nga nakalawig sa tabok sang Gabi-Gabi river sa boundary sang San Carlos City, Negros Occidental kag Canlaon City, Negros Oriental.
Aminado ang hepe nga kabisado man sang solterito ang lugar kag ini ang nakahibalo man maglangoy, apang bangod aksidente nga nakadanlog, ang biktima ang wala makapangaman sang gintaban sang mabaskog nga daludo sang tubig.
Suno kay Silva, masobra 10 kilometros ang distansya sang balay sa Canlaon City proper gani wala man gilayon nakalab-ot ang mga kapulisan kag rescue units.
Dugang pa sang hepe nga tuman ka baskog sang current kag indi man sini marisgo ang mga personnel, bangod sa posibilidad nga imbes makabulig, sila pa ang magakinahanglan sang rescue.
Wala na sang kabuhi sang naretrieve ang bangkay kag ini ang madamo man sang mga pilas bangod sa pagbunggo-bungo sa mga bato.
Paathag ni Silva nga wala sang sagad maglangoy kun mabaskog nga baha na ang gina-estoryahan.
Panawagan na lamang sini sa mga pumuluyo nga magpabilin na lamang sa balay kun malain ang tiyempo kag likawan gid ang pagtabok sa mga suba.
Samtang kun mag-abiso ang mga local government unit sang evacuation, mas maayo nga magsunod na lamang kag indi na magbalibad bangod ini ang para man sa kaayuhan sang tanan.
