14 na tanan ka mga insidente sang pagpatay sa Negros Occidental ang gin-ako sang New Peoples Army humalin sang Enero tubtob subong nga Oktubre.
Sa interview sang Bombo Radyo Bacolod kay Negros Occidental Police Provincial Office spokesperson Police Captain Judesses Catalogo, gin-ako sang NPA nga sila ang yara sa likod sang pagpamatay sa banwa sang Calatarava, Toboso, Cuayan, kag ciudad sang Kabankalan kag San Carlos.
Suno diri, ang rason sang mga NPA amo nga mga asset sang gobyerno ang mga biktima apang gin-athag sang kapulisan nga wala na nagagamit sang asset ang kapulisan bangod madamo na sang mahimo makuhaan sang impormasyon.
Suno pa diri, iban sa mga biktima amo man ang mga anay miyembro sang NPA nga ila gina-ingganyo nga magbalik sa hublag apang nagpamatok.
Sa pag-ako sang NPA suno kay Catalogo mas mahapos na ang pagpasaka sang kaso batok sa ila kag mahapos na ang pagkilala kun sin-o ang mga suspek samtang iban diri sa mga NPA napasakaan na sang kaso.
