14 tanan ka mga buluthuan sa District 4 sa probinsya sang Negros Occidental ang nagkansela sang klase subong nga adlaw bangod sa baho sang asupre naggikan sa bulkan Kanlaon.
Sa interview sang Bombo Radyo kay Mai Baylon, Local Disaster Risk Reduction and Management Officer 1 sang Bago City, nagapadayon ang unrest activity sa bulkan.
Suno diri, kahapon may yara sang mga reports nga may presensya sang baho sang asupre apang indi gid man ini maisog.
Apisar sini ginpakamaayo na lamang nga suspendihon ang klase subong nga adlaw agud nga maprotektahan ang mga kabataan kag mga manunudlo.
Lima tanan ka brgy sang ciudad nga may mga buluthuan ang nagkansela sang klase nga ginalakipan sang brgy Mailum, Ilijan, Bacong, Ma-ao kag binubuhan.
Panugyan sini sa mga residente ilabi na sa upland barangays nga maghanda kag magulu-aligmat sa sitwasyon sang bulkan Kanlaon.
