Patay ang 15 anyos nga estudyante nga nagluthang sa iya kaugalingon sa One Regis, Megaworld Upper East, Barangay Villamonte, Bacolod City kahapon, ala- 01:35 sang hapon.
Ang lalaki nga biktima ang residente sang Catalbas street, Poblacion Uno, Sagay City kag temporaryo nga nagatinir sa Sharina Heights, Barangay Taculing, Bacolod City.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, matapos nga mabatian ang duha ka lupok gilayon nga nagpadulong ang kapulisan sa area.
Sa inisyal nga imbestigasyon, nagluntad ang argumento sa tunga sang biktima kag sang iya kahagugma sang hinali lang nga naggabot sang armas-luthang ang 15 anyos kag gintiro ang iya kaugalingon.
Nag-agom ini sang isa ka igo sa ulo kag naabtan sang rescuers nga may yara pa sang kabuhi kag gilayon ini nga gindala sa Doctor’s Hospital.
Apang didto na ini ginbawian sang kabuhi sa ospital.
Padayon ang imbestigasyon kun sa diin nakuha sang biktima ang armas-luthang kag kun ano ang rason sa pag-utas sini sang iya kaugalingon nga kabuhi.
