Kun ang iban nagapasalig sa ila kahagugma nga kuhaon ang bulan para ihatag sa ila nobya.
Pinasahi naman ang ginhimo sang 15 anyos nga German nga lalaki nga nangawat sang bus sa isa ka transportation company kag ginmaneho ini sa kalayoon nga 80 miles agud madul-ong ang iya nobya sa eskwelahan.
Nahimo sang sulterito nga makasulod sa bus company kag makuha ang master key sang unit kag nahimo nga namaneho sini ang salakyan nga wala sang may nakanotisyar.
Nakuha sa CCTV camera ang natabo apang nagapati ang staff nga isa sa ila drivers ang nagkuha sang bus.
Bisan natabo ang insidente alas- 6:00 sang aga, sang hapon na napahibalo ang mga kapulisan bangod ulihi na natukiban nga kumpleto ang mga drivers pero kulang ang unit.
Gamit ang GPS-positioning device sa bus, na-locate sang pulis ang bus sa pihak nga ciudad sa kala-uyon nga 130 km.
Nakibot ang mga pulis nga sultero nga lalaki ang nagamaneho sang bus kag ginsugat sini ang iya nobya sa buluthuan.
Suno sa kapulisan, wala pa nahibaluan kun paano nakuha sang lalaki ang yabi kag kun paano nga maayo ini magmaneho para madul-ong ang iya 14 anyos nga nobya.
Nagapangatubang sa kaso nga theft, unlicensed driving kag iban pa ang sulterito kag ginapakamaayo nga wala sang reported nga casualty kag nabalik ang bus sa tag-iya nga wala sang gasgas.
