Priso ang isa sa duha ka mga suspetsado nga gina-alegar nagsunod kag nagtuyo nga mag-abduct sa isa ka 15-anyos nga babayi sa Brgy. Mansilingan, ciudad sang Bacolod kahapon.
Una diri, gikan sa downtown ang 15-anyos kag sang nagsakay ini sa jeep pauli sa Grandville 3 subdivision, gintuparan ini sang duha ka mga suspetsado nga ginkilala kay Mariven Seraspe, 21-anyos sang Paglaum Village, Mansilingan kag Raymund Seraspe, 20, nga pakaisa ni Mariven.
Diri ginpamangkot sang babaye nga suspek ang biktima kun diin ini nagapauli kag nagsabat ini nga taga-Candoni.
Nahibalu-an nga tumandok sang Candoni ang biktima apang nagatrabaho kag ginapa-eskwela ini sang iya paryente nga taga-Mansilingan.
Sang nagpanaog na sa jeep kag nagsakay sa traysikol pasulod sa subdivision ang biktima, nagsakay man ang mga suspetsado kag nagsunod sa iya sang nagpanaog naman.
Sang nagalakat na ang biktima pakadto sa ila balay, nagbantay lang sa unhan si Raymund, samtang ginsunod gid ni Mariven ang biktima kag gin-uyatan sa liog kag kamot kag ginpaandaman nga indi na magpalagyo kag mag-upod na lang sa iya.
Apang bangud indi kilala sang biktima, nagsinggitan ini sa nagalabay nga mga traysikol apang nagahambal ang suspek nga indi mag-intra bangud ginapapauli niya ini sa Candoni kag may deperensiya sa paminsaron.
Apang padayon nga nagabato ang biktima tubtob nga nakalab-ot sila sa madamo nga mga tawo.
Sang nagdamo na ang tawo, nagpalagyo si Raymund samtang gin-hold na sang pumuluyo si Mariven tubtob nag-abot ang mga pulis.
Suno sa hepe sang Police Station 7 nga si Police Lt. Florentino Abalayan, nag-abot man ang mga amo sang biktima kag diri na ginpapriso ang suspetsado.
Suno sa hepe, kaso nga Grave Coercion in Relation to RA 7610 ang ipasaka batok sa suspetsado.
Nagpangayo sang pasaylo ang suspetsado nga nagsunod-sunod kag gina-alegar nagtuyo nga mag-abduct sa 15-anyos nga biktima sa Brgy. Mansilingan, ciudad sang Bacolod.
Sa interview kay Mariven Seraspe, 21-anyos sang Paglaum Village, Mansilingan nga amo ang nagsunod sa biktima nga naga-istar karun sa Grandville 3 subdivision, ginpanginwala sini nga may malain siya nga tuyo sa iya ginhimo.
Suno diri, ginapapauli lang niya sa Candoni ang biktima kag wala man siya sang anu pa nga plano sang iya ini ginsunod halin sa jeep pasulod na sa ginapulian sini nga balay.
Gani nagapangayo ini sang pasaylo sa biktima kag sa mga amo sini kag nagahingyo man ini sang pasaylo.
Gin-abswelto man sini ang iya pakaisa nga si Raymund Seraspe, 20-anyos.
Si Raymund ang upod ni Mariven sang ila ginsunod ang biktima halin sa downtown.
Suno diri wala sang kahilabtanan si Raymund sa iya ginhimo.
Apisar sang pagpangayo pasaylo, nagapabilin ini karun nga priso sa Police Station 7 kag nakatilaw pa sang sumbag sa amo sang 15-anyos nga himata man lang sini.
May impormasyon man nga nakuha ang Bombo Radyo Bacolod nga nagapang-bugaw ang babaye nga suspetsado.
