15 ka mga anay miyembro sang New People’s Army nga nagbalik sa sabak sang gobyerno ang nakabaton sang cash assistance nagikan sa provincial government sang Negros Occidental kahapon sa idalum sang Enhanced Comprehensive Local Integration Program (E-CLIP) nga programa sang gobyerno.
Nahibaluan nga may yara sang tatlo ka sahi ang ayuda nga mabaton ang mga anay rebelde.
Lunsay nakabaton sang P15,000 nga immediate assistance kag P21,000 nga reintegration assistance ang 15 ka mga anay miyembro sang makawala nga grupo samtang isa diri ang nakabaton pa gid sang P50,000 nga livelihood assistance.
Sa speech ni Governor Eugenio Jose “Bong” Lacson sa ginpatigayon nga seremonya sa Provincial Capitol kahapon, nagapasalamat ini nga nagbalik ang mga anay NPA members sa sabak sang gobyerno kag nagalaom nga mangin ehemplo sa iban nga mga miyembro sang makawala nga grupo nga magbalik naman.
Suno kay Lacson, handa gid nga magbulig ang gobyerno sa mga rebelde nga luyag magpanumbalik.
Gindugang man sini nga ang nabaton nga cash assistance sang 15 ka mga anay NPA ang bulig agud makasugod sila sang bag-o nga pagpangabuhi.
