15 ka mga banwa kag ciudad ang nagpatuman sang evacuation sa probinsya sang Negros Occidental bangod sa mga pagbaha.
Sa interview sang Bombo Radyo Bacolod kay Irene Bel Ploteña, focal person sang Negros Occidental Provincial Disaster Management Program Division (PDMPD), may ara gihapon sang mga ma-eksperyensyahan nga kasarangan tubtob sa mabaskog nga ulan nga lauman nga magalawig pa tubtob bwas.
As of 11:00 kaina sang aga, 15 na ka mga local government units ang nakapatigayon sang evacuations nga ginalakipan sang San Enrique, Valladolid, Pontevedra, Isabela, Bago City, Hinobaan, Sipalay City, Himamaylan City, Cauayan, Hinigaran, Ilog, Moises Padilla, Kabankalan City, Pulupandan kag La Castellana.
Nagdangat naman sa 13,115 ka pamilya ukon 42,702 ka indibidwal ang yara sa evacuation centers.
Iban sa mga ini ang nagpatuman preemptive evacuation, apang may-ara man sang nagpatigayon sang forced evacuation ilabi na sa mga lugar nga madalom ang pagbaha.
Aminado si Ploteña nga iban sa mga evacuees ang gilayon man nga nagapauli sa pagkulpa sang tubig-baha ukon pagpanaog sang water level sa mga suba.
Apang may iban nga ginpatinir nalang sa evacuation center, hinali nga magkusog pa ang ulan kag liwat nga magsaka ang baha.
Magluwas sa mga LGUs nga nagabulig sa mga evacuees, naga-augment man ang Department of Social Welfare and Development (DSWD) kag Negros Occidental Provincial Government.
Pahanumdom naman sini sa mga pumuluyo nga magpamati sa mga advisories kag kun may abiso ang LGUs para sa evacuation, magsunod na lamang sa instructions.
