Pilason ang 15 ka indibidwal, nga kalabanan mga estudyante matapos nga mahulog sa kalog ang ginasakyan nga public utility jeepney sa National Highway sang Barangay Hilamonan, Kabankalan City, Negros Occidental.
Sa interview sang Bombo Radyo Bacolod kay P/Lt Col John Joel Batusbatusan, hepe sa Kabankalan City Police Station, ang jeep ang ginasakyan sang 14 ka mga pasahero nga ginalakipan sang 13 ka mga estudyante kag isa ka principal ukon 16 ka persona kalakip sa kundoktor kag driver.
Ang driver sang ang ginkilala nga si Zaldy Bendita, 37 anyos, residente sa Purok Starapple, Barangay Camingawan, Kabankalan City.
Santo sa imbestigasyon sang kapulisan, gikan sa Barangay Tagukon, Kabankalan City ang mga biktima kag padulong kuntani sa City Proper sang syudad.
Pahayag ni Batusbatusan nga pagdangat sa lugar, nag-overtake ang jeep sa isa ka tricycle apang sang ginbalik na sini ang manobela sa nagakaigo nga lane, hinali na lamang may nagluntad nga mechanical error.
Bangod sini nadulaan sang kontrol ang driver kag nagbunggo ang jeep sa parameter wall sang Villa Concha Subdivision tubtob nga nagderetso sa kalog sang isa ka kampo.
Ini ang nagresulta sa pagkasamad sang 14 ka pasahero kag ang konduktor samtang ang driver lamang ang wala nakaangkon sang samad.
Suno ka Batusbatusan, ang 15 ka mga biktima ang gilayon nga gindala sa Kabankalan District Hospital kun sa diin 13 ang outpatient samtang naadmit naman ang duha.
Personal naman nga nagsungka sa Kabankalan City Police Station ang driver kag ginahulat na lamang sang kapulisan kun magapasettle ang mga biktima ukon magapasaka sang kaso.
