Ginkompirmar sang pinuno sang Repatriation Committee sa ciudad sang Bacolod nga may yara sang 15 ka mga returning residents nga nakapauli na kahapon.
Sa interview sang Bombo Radyo Bacolod kay Councilor Cindy Rojas, ginpahayag sini nga bangud sa constant communication sang mga returning residents kag natabuan man nga may yara sang flight ang isa ka airline company padulong sa Bacolod kagab-i agud magkuha sang mga US citizens nga igadal-on sa Manila nga magabalik man sa Estados Unidos.
Ginhingyo sang Local Government Unit (LGU) sang Bacolod City sa nasambit nga airline company nga kun mahimo makasakay ang 15 ka mga returning residents apang ginbayran sang mga ini personal ang ila mga plane ticket.
Ginpahayag man sini nga may duha ka mga Negrense nga residente sang Silay City ang nalakip sa mga ini nga ginturn-over naman sa probinsya para man sa mandatory quarantine.
Suno kay Rojas may yara naman sang gin-offer nga isa ka hotel nga gintigana para sa luyag nga magtinir diri apang dapat bayaran sang mga ini ang hotel bills.
Ginhatagan man sang prayoridad sang ciudad ang tanan nga may ginabatyag nga medical conditions.
Ang mga ini ang gindala sa isa ka quarantine centers agud magcomply sang 14-day mandatory quarantine.
Luyag man sang ciudad nga mapapauli ang masobra isa ka gatos nga mga na stranded nga mga Bacolodnon apang kinahanglan nga ikonsiderar ang available nga quarantine centers nga pagabutangan sang mga ini.
Ginpahayag man sini nga ang tanan nga nag-abot ang ginkonsiderar nga Persons Under Monitoring (PUM) kag ipaidalom sa mandatory swab testing.
Sa karun may yara man sang ginadihon ang LGU sang Bacolod nga trip sa 2 go bangud nagapangita man ang iban nga mga returnees sang mas barato nga alternative agud makapauli.
Nagahingyo man sang pag-intindi sa mga nastranded si Rojas bangud may yara sang mga requirements nga dapat pagasundon sa pagpauli sang mga ini santo man sa mando sang Inter Agency Task Force (IATF).
Aminado man ini nga indi mahapos ang pagpapauli sang mga stranded nga mga Bacolodnon bangud nagakinahanglan ini sang koordinasyon sa tagsa ka mga LGU kun sa diin stranded ang mga ini kag nagapang-alang alang man sila sang approval nagikan diri.
Suno kay Rojas kinahanglan nga mangin mahinalungon sa tanan nga mga tikang nga ginahimo agud malikawan ang local transmission.
Positibo naman ini nga sa amat-amat matigayon nga mapapauli ang tanan nga nastranded.
Nagalaom man ini nga indi na madugangan ang mga nagpositibo sa COVID-19 sa ciudad.
May yara man sang hotline numbers nga ginpain ang ciudad agud magcater sang mga luyag magpauli sa mga nastranded nga Bacolodnon sa diin man nga bahin sang pungsod.
