Kadungan sang paghatag sang seguridad sa katapo sang Regional Drug Enforcement Unit (RDEU) matapos magpatigayon sang buybust operation sa syudad sang San Carlos sa probinsya sang Negros Occidental, natukiban sang katapo sang San Carlos City Police Station ang mga gintanom nga marijuana.
Sa interview sang Bombo Radyo Bacolod kay Police Lt. Ruby Aurita, deputy chief sang San Carlos City Police Station, ginpahayag sini nga ang RDEU nga ginpangunahan ni Police Lt. Col. Mark Anthony Darroca ang nagpatigayon sang buybust operation sa Lower Natuyay, Barangay Codcod, San Carlos City kun sa diin nagresulta sa pagkadakop kay Benjie Clarion alyas Benjie.
Suno kay Aurita samtang nagahatag sang seguridad sa katapo sang RDEU nga nagapatigayon sang buybust operation sa nasambit nga lugar nasiplatan sang katapo sang San Carlos City Police Station ang natanum nga marijuana kag natigayon sang mga ini nga makuha ang 15 ka puno sang fully grown marijuana.
Gin-athag man ni Aurita nga ang nakompiskar nila nga Marijuana ang lain sa nakompiskar sa posesyon ni Clarion matapos ginpatigayunan sang buybust operation.
Ginpahayag man sang deputy commander sang nasambit nga Police Station nga nakuha sang RDEU kay Clarion ang 76 ka bag o nga tanum nga Marijuana kag 25 ka fully grown nga Marijuana nga nagabalor sang P19, 200.00.
