152 tanan ka kaso sang firecrackers related injuries sa yuletide season narekord sa Negros Island Region.
Sa interview sang Bombo Radyo Bacolod kay Department of Health – Negros Island Region Assistant Regional Director Adrian Hort Ramos, nag-untat na kahapon, Enero 6 ang ila monitoring sa firecrackers related injuries apang sang Enero 2 pa lamang wala na sila sang may narekord nga kaso.
Suno diri, sa 152 ka kaso, 115 diri sa probinsya sang Negros Occidental, 30 sa Negros Oriental, isa sa Siquijor kag anum sa ciudad sang Bacolod.
Samtang, apat naman ang ginpaidalom sa amputation nga lunsay yara tanan sa Negros Occidental.
Suno kay Ramos, nagapanguna nga rason sa firecrackers related injuries amo ang triangulo, nga ginasundan sang kwitis, mga unknown firecrakcers, boga, 5 star, candle bomb, kag whistle bomb.
Mensahe ni Ramos, pilion ang safe nga pagselebrar sang okasyon.
May pagnubo sa pito ka kaso sa firecrackers related injuries sa probinsya sang Negros Occidental sa tuig 2025 sa pagsugata sa tuig 2026.
Suno kay Negros Occidental Provincial Health Officer Dr. Girlie Pinongan, nag-umpisa sang Disyembre 21, 2025 ang ila monitoring tubtob Enero 6, 2026 kun sa diin may yara sila sang narekord nga 100 ka kaso.
Suno diri, 107 ang kaso nga narekord sang tinalikdan nga tuig 2024 sa pagsugata sa tuig 2025.
Suno kay Pinongan, pinakamadamo nga kaso sang firecrackers related injuries narekord sa ciudad sang Bago apang sang tinalikdan naman nga tuig, ang may pinakamadamo amo ang ciudad sang Silay.
Kalabanan sa mga biktima ang naga-edad sang 11 tubtob 20 anyos.
May yara sang tatlo nga ginpaidalom sa amputation samtang ang iban naman nag-angkon lamang sang mild injuries.
Pahanumdom ni Pinongan nga sa masunod mas maayo nga mangita sang alternatibo nga pamaagi agud magtuga sang gahod sang sa maggamit sang palupok.
